በጉጂ ዞን የሰማያዊ ፓርቲ አባላት እየታደኑ እየታሰሩ መሆናቸው ተገለጸ

በዞኑ የፓርቲው ሰብሳቢ አቶ ግርጃ ገቦውጮ ዛሬ የካቲት 03/2008 ዓ.ም እንደገለጹት ከቅዳሜ ጀምሮ ጉጂ ዞን ቦሬ ወረዳ ላይ ለእስር የተዳረጉት የሰማያዊ ፓርቲ አመራሮችና አባላት መምህር ጥላሁን አለቄ፣ መምህር ዮናስ ገልቱ እና አቶ ኤሊያስ ቶቶላ ናቸው፡፡ በእስር ላይ የሚገኙት አባላት ቤታቸው በፖሊስ መፈተሹም ታውቋል፡፡

አቶ ግርጃ እንደገለጹት ጉዴሳ ዋደሞ፣ ሽብሩ ጎዳና፣ ዮሃንስ ባልዲ፣ ወ/ሪት ፍሬ ገ/ህይወት፣ ሀጂ ኡመር ሸካ ደግሞ በፖሊስ ማዘዣ ወጥቶባቸው እየተፈለጉ የሚገኙት አባላት ናቸው፡፡

በዞኑ በሰማያዊ ፓርቲ አባላት ላይ እየተደረገ ያለው እስር ምክንያት በኦሮሚያ ክልል በተቀሰቀሰው የህዝብ የመብት ጥያቄ ንቅናቄ ላይ ‹‹የዞኑን ህዝብ ታደራጃላችሁ፣ መንግስትን ትቃወማላችሁ›› የሚል መሆኑን አቶ ግርጃ ገልጸዋል፡፡